చెట్టు

వాలడానికో చెట్టుండాలి

 రెక్కలు కట్టుకొని వాలడానికి 

ఓ చెట్టుండాలి.. 

 ఉల్లాసంగా కొమ్మనంటి ఊగడానికి 

 ఓ చెట్టంటూ ఉండాలి; 

 వెలుతురు వస్తూ .. కొత్తచూపు యిస్తుంది అప్పుడే వేటా మొదలౌతుంది.. 

పొద్దు వాలిపోతుందనగా... రెక్కల మాటున రగిలే ఆరాటం.. 

స్వరాల రాగాల దారి తప్పనీయని ఆనవాళ్లని.. జాడల్నీ వెంబడిస్తూ వచ్చి, 

వాలేందుకు.. ఓ చెట్టు ఉండాలి.

 

రెక్కల అలుపు తీరేందుకు, 

చీకటి మాటున వొదిగేందుకు 

ఓ చెట్టు ఉండాలి.. 

సద్దుమణిగాక.. వాటి పాటల తో పాటే, 

వాటిని తన ఆకుపచ్చని వొడిలోకి తీసుకున్న ఆ చెట్టూ.. రాత్రంతా.. నిశ్శబ్ద గీతం పాడుకుంటుంది..