స్నేహ సందేశం

 

స్నేహ సందేశం

అర్జునుడు సమ్మోహనాస్త్రం వేసాడు. ఓ అందమైన అప్సరస వచ్చీ చేతిని అలా... తిప్పగానే  కౌరవ సేన అంతా మాయ కమ్మి, గాఢ నిద్రలోకి జారుకుంది.  ఉత్తర కుమారుడు సాహసోపేతంగా వచ్చి కలలన్నీ వొలుచుకున్నాడు.. జ్ఞాపకాలుగా.. 

రాత్రి మాంఛి నిద్ర.. ఫోన్ అనే అస్త్రం.. చేతిలోంచి జారిపోయింది.   గుప్పెట మూసే ఉంది.. దూసుకున్న కలలన్నీ ఖాళీచేసి వెళ్ళి పోయాయి!

ఈ రోజు స్నేహితుల దినోత్సవం ట. స్నేహితుల ని కలుసుకోవడం కూడా కల లో మాటే! 

బయట చూస్తే వెన్నెల కాస్తూన్నట్టు.. చల్లని సూర్యుడు పైకి వచ్చేశాడు.  ఉత్తర దిశలో వానమబ్బులు  మాత్రం సూర్యుడికి భయపడవట.. గబ గబా ఆ దిక్కున ప్రయాణం చేస్తూ ఉన్నాయి.. 

పరుగెత్తే ఈ మబ్బులని కాసేపు ఆపి అడుగుదాం.. కబుర్లు ఏమైనా అందిస్తాయేమో.

ఓ వాన మబ్బుల్లారా.. !

మీరెటు పోతున్నారో కాని

మీ దారిలో 

నా మిత్రులు చాలామంది ఉన్నారు.

చరవాణిలో నేనెలాగూ సందేశాలు పంపాను..

పూలగుత్తి బొమ్మలను పెడుతూ..

కానీ;

కానీ.. ఊరి అవతల..కొండపక్కన

నా మిత్రుడు ఒకడు ఉన్నాడు..

రాళ్లూ..ముళ్లూ ఏరి చదును చేసి..

పదును చేసి..  నీ రాక కోసం చూస్తూ ఉంటాడు.

గవర్నమెంట్ ఇచ్చింది ట..

కొండ పక్కనే.. ఏ వానమబ్బో కొండచరియ తో

చెలిమి చేసి..స్నేహ వాగు కురిపించదా

అన్నాడు‌.. అచ్చం ఇట్టాగే కాదనుకో.

తన భాషలో.. తెల్లని తన నవ్వులో

ఆకాశమంత ఆశను పరచి..

చెప్పాడు అపుడెపుడో.

అక్కడి దాకా వెడతారని నాకు తెలుసు

స్నేహమై కురుస్తారని తెలుసును..

అయినా ఏదో నామాటగా.. 

అందరికీ అంతర్జాతీయ స్నేహితుల దినోత్సవ శుభాకాంక్షలు💐